إيه أفضل طرق المذاكرة.....مهم

بسم الله الرحمن الرحيم

صباح الخير............يوم جميل

أنا عملت الموضوع دآ هنآ بحيث تبقي الإفادة عامة .

طبعآ أحنا حالياً كلنا شغالين دح متواصل 24 ساعة بالتمام والكمال عشان نخلص المنهج الظريف واللذيذ بتاعنآ دآ،فكنت عاوز بقي أتناقش معاكم في أفضل طرق المذاكرة اللي بتوفر الجهد والوقت وكمان متخلكش تنسى اللي أنت ذاكرته ، وكل واحد طبعآ متعود علي طريقة كان شغال بيهآ من أيام الثانوية والإعدادية وممكن الإبتدائية كمآن ، وممكن تكون طريقته دي صح بس بتتعبه شوية وممكن تكون غلط وبتتعبه برده عشان دي صفة المذاكرة.

عشان كدآ أنا حقولكم أيه أشهر طرق المذاكرة المتداولة يعني وكل واحد يقول رأيه ويقول ع الطريقة اللي شغال بيهآ وبيحبهآ ويستريحلهآ وميقدرش يستغني عنهآ

بسم الله ونبدأ.....

الطريقة الأولي.....
الطريقة الجهرية (طريقة الكتٌاب): وهي بكل بساطة إنك بتقعد تنبح في صوتك وتعيد وتزيد في الجملة لحد متخش دماغك وتحفظهآ ، وممكن وأنت بتذاكر تقعد تتمشي في الأوضة وممكن تروح تعملك كوبايه نسكافيه يعني بتعيش اللحظة ، وفي ناس كتير بتتبع الطريقة دي وأنا الصراحة واحد منهم ، بس علي فكرة مبتنفعش في كل المواد. بس طبعآ اللغات متتذكرش غير بالطريقة دي.

الطريقة التانية.....
الطريقة الكتابية (طريقة المملين): ودي أكتر طريقة مملة في المذاكرة ، وهي إنك بتمسكلك كوبشة ورق وتقعد تكتب وتكتب وتكتب تاني وفي الأخر بتنسي كل حاجة ، وعلي فكرة أكتر البنات بيستخدموهآ وفي ولاد برده وأنا كنت واحد من الولاد دول لمآ كنت في إعدادي بس لما دخلت الثانوية ربنآ تاب عليآ وبقيت شغال بالطريقة الأولي التي سبق شرحهآ.

الطريقة الثالثة.....
طريقة النظر والإحساس : ودي أخويآ هو اللي مبتدعهآ ، أنا كنت بشوفه الصراحة وبقلس عليه ، هو بالظبط كان بيقعد علي المكتب وعينه في الكتاب ومبيكلمش خالص ولا بيقول أي حاجة ولا بيكتب أي حاجة وعينه بس هي اللي شغالة، بس كان بيقولي أنه متعود علي كدآ .


الطريقة الرابعة.....
طريقة تكبير الدماغ : وهي بكل بساطة إنك تكبر دماغك خالص ومتذكرش من اساسه ولا جهرية ولا كتابية ولا حتي إحساسية ، أحنا لسه حنقعد نحس الكلام أحنا فاضين يا عم ، أحنا ورانآ مسئوليات بلا مذاكرة بلا نيلة.


يا ريت كل واحد يخش ويقول علي أفضل طريقة بالنسبة له وكمآن يراعي إن مفيش وقت فيقول بقي علي أكتر طريقة سريعة، ولو عنده أي طريقة تانية غير دول هو مفتكسهآ يا ريت يقولها برده وميبخلش علينآ .......وشكرآ